(ژباړه)

خبر:

د فلسطین د بشري حقونو مرکز په معاصر دور کې په ناوړه توګه د انساني حقونو تر پښو لاندې کولو په اړه یو مستند جوړ کړی دی. دغه مرکز وايي چې د دوی د څېړنې ډلې په وروستیو اونیو کې د هغو ګڼو فلسطینیانو نوې کیسې راټولې کړې دي، چې په غزه کې نیول شوي او تازه له اسرائیلي زندانونو او کمپونو څخه ازاد شوي دي.

د همدغو شهادتونو پر بنسټ، نیول شویو کسانو د «منظمې او پلان شوې جنسي شکنجې» راپور ورکړی؛ چې تېری، بربنډول، اجباري عکس اخیستل، د وسایلو او سپیو په وسیله جنسي ځورونې او همدارنګه په قصدي توګه رواني سپکاوی پکې شامل وو. د دوی په وینا موخه یې «د انساني کرامت ماتول او د فردي هویت بشپړ له منځه وړل» وو. (د ساما نیوز له راپور څخه اخیستل شوی، په لږ بدلون سره)

تبصره:

دغه مرکز هغه کیسې بیانوي چې د انسان بدن لړزوي؛ د هغو کسانو کیسې چې پخپله د دغو ظالمانه او وحشیانه چلندونو قرباني شوي دي. همدا بسنه کوي چې د دغو روایتونو له یوې وړې برخې څخه پرده پورته شي، ترڅو د هر انسان وینه په رګونو کې وایشي او د اسلامي امت په لښکرو کې ویښ وجدانونه د خپلو درد ځپلو وروڼو او خویندو د ملاتړ لپاره راپاڅول شي.

له هغه وخته چې پر غزې جګړه یا لږ تر لږه د هغې ځیني اړخونه، درول شوي دي، د هغو جنایتونو اړخونه ورو ورو راڅرګندېږي چې یهودي اشغالګرو د غزې پر خلکو (نارینه‌وو، ماشومانو او ښځو) ترسره کړي دي. دغه وضعیت په څرګند ډول ښيي چې دوی یوازې د «امنیت او پولو» لپاره نه جنګېدل؛ بلکې ښکاري چې جګړه یې د اسلام او مسلمانانو پر وړاندې له کرکې او دښمنۍ څخه ډکه وه، چې اصلي قربانیان یې د غزې خلک او د ټول فلسطین مسلمانان دي. ایا د بندیانو، ښځو او ضعیفانو پر وړاندې تېری، سپکاوی او شکنجه همغه امنیت دی، چې نتنیاهو او د هغه شریک (ټرمپ) یې یادونه کوي؟!

تاوتریخوالی او سادیستي چلندونه (له شکنجې څخه خوند اخیستل) یوازې هغه کسان کوي، چې خپل ټول انساني او اخلاقي ارزښتونه یې له لاسه ورکړي وي، څنګه امکان لري چې دغه کسان دې منځني ختیځ ته سوله او امنیت راولي، همغه امنیت چې نتانیاهو او ټرمپ یې په اړه خبرې کوي؟

دغه بې‌رحمانه جنایتونه او چلندونه چې د فلسطین د خلکو پر وړاندې د اشغالګرو د ټولو کړنو، په ځانګړي ډول د تېرو دوو کلونو د وحشتونو بشپړ انځور وړاندې کوي، په څرګند ډول ښيي چې د امریکا او یهودي رژیم ستونزه په فلسطین کې یوازې سیاسي او امنیتي نه ده؛ بلکې عقیدوي او ایډیولوژیکه ریښه لري. دوی د ۲۰۲۳م د اکتوبر د ۷مې په پېښه کې هغه پلمه وموندله، چې خپله کرکه او دښمني يې پرې څرګنده کړه؛ لکه څنګه چې تر دې وړاندې امریکا د ۲۰۰۱م د سپټمبر ۱۱مې پېښې څخه په ټوله نړۍ کې د اسلام او مسلمانانو د ځپلو لپاره استفاده وکړه.

په همدې توګه ناورینونه یو په بل پسې دوام لري او داسې روایتونه او صحنې راڅرګندېږي چې ان ډبره هم ژړوي او دا ناره هغو ټولو کسانو ته هم رسېږي چې د اسلامي امت په لښکرو کې ځواک او وړتیا لري، ترڅو ژر تر ژره د دغه ظلم د پای ته رسولو لپاره اقدام وکړي او لښکرې د فلسطین او د مسلمانانو د ټولو غصب شوو خاورو د ازادولو په موخه وخوځېږي. په دې توګه د نبوت په منهج خلافت تاسیس کړي، ترڅو عزت، کرامت او ځواک یو ځل بیا د دوه میلیاردي امت مسلمانانو ته ور وګرځي.

لیکوال: انجنیر صلاح الدین عضاضة

۱۴۴۷هـ.ق د جمادي الثاني ۱

۲۰۲۵م د نومبر ۲۲مه

ژباړن: صهیب منصور